დავოსით იწყება წლის ეკონომიკური დღის წესრიგი მსოფლიოში, შეიძლება ასე ითქვას, და დავოსში ჩამოდიან მსოფლიოს ბიზნესის წამყვანი ლიდერები, ასევე პოლიტიკოსები, – ამის შესახებ ვიცე-პრემიერმა, ეკონომიკისა და მდგრადი განვითარების მინისტრმა, ლევან დავითაშვილმა დავოსში განაცხადა.მისი თქმით, მნიშვნელოვანია, თუ რა დღის წესრიგი აქვს ზოგადად დავოსს და რა დღის წესრიგი აქვს საქართველოს დავოსში მონაწილეობისას.
„ჩვენთვის მნიშვნელოვანია, რომ ჩვენი ქვეყნის ეკონომიკური პროგრესი გავაცნოთ საერთაშორისო პარტნიორებს, ბიზნესის ლიდერებს, შევხვდეთ იმ სექტორების წარმომადგენლებს, სადაც საქართველოს განსაკუთრებული პოტენციალი გააჩნია, შეხვედრებს ვმართავთ მსოფლიოს წამყვან კომპანიებთან, რომლებიც მოღვაწეობენ ენერგეტიკის სფეროში, Real Estate-ის და სტუმარმასპინძლობის სფეროში, სამრეწველო და ტურისტული მიმართულებით. ჩვენ ასევე ვხვდებით საინფორმაციო და BPO წარმომადგენლებს. ესეც ძალიან მნიშვნელოვანი, დინამიკური ახალი სექტორია საქართველოსთვის. ფაქტობრივად ყველა კომპანიის მხრიდან არის ძალიან დიდი დაინტერესება, რომ საქართველოსთან ითანამშრომლოს. ზოგიერთი კომპანიის ფილიალები საქართველოსთან უკვე თანამშრომლობენ, მაგრამ აქ საუბარია იმაზე, რომ ჩვენ თანამშრომლობის შესაძლებლობები გამოვიკვლიოთ და კიდევ უფრო მეტი იყოს ინვესტიციები საერთაშორისო წამყვანი კომპანიების მხრიდან ჩვენს ეკონომიკაში. შესაბამისად, საქართველოსთვის დავოსში მონაწილეობა ეკონომიკური კუთხითაც ძალიან მნიშვნელოვანია. ამავე დროს, ქვეყანა, რა თქმა უნდა, აქ მონაწილეობით აჩვენებს იმას, რომ არის სტაბილური პოლიტიკური გარემო, სტაბილური, საიმედო და პროგნოზირებადი ქვეყანა, რომელსაც საერთაშორისო პარტნიორები შეიძლება ენდონ“, – განაცხადა ლევან დავითაშვილმა.
