დედაქალაქში საახალწლო განათებების მონტაჟის პროცესი გრძელდება. ახალი ილუმინაციების მოწყობა მიმდინარეობს რუსთაველის გამზირზე, სადაც ბოლო სამონტაჟო სამუშაოებს თბილისის მერი კახა კალაძე, მერის მოადგილესთან, ანდრია ბასილაიასა და „თბილსერვის ჯგუფის“ დირექტორთან, დავით ფაჩულიასთან ერთად გაეცნო.

დედაქალაქის მერის თქმით, თბილისის მოსახლეობას და სტუმრებს სასიამოვნო სადღესასწაულო დღეები ელოდებათ.

„საახალწლო სამზადისი მიმდინარეობს ჩვენს ქალაქში. 15 დეკემბერს ქალაქის მთავარი ნაძვის ხე საზეიმოდ განათდება. ამავდროულად, საახალწლო ილუმინაციები ჩაირთვება. მინდა, მოვუწოდო ყველას, ვისაც სურვილი აქვს, მობრძანდნენ რუსთაველის გამზირზე, პარლამენტის წინ, საღამოს რვა საათზე, სადაც გაიმართება ნაძვის ხის ანთების ღონისძიება. ერთად ჩავიფიქროთ სურვილები, ვუსურვოთ ერთმანეთს წარმატებული მომავალი, მშვიდობა და კეთილდღეობა. გარდა ამისა, 16 დეკემბერს ორბელიანის მოედანსა და მიმდებარე ქუჩებზე გაიხსნება საახალწლო სოფელი. საზოგადოებას ვპირდებით სასიამოვნო დღეებს. საახალწლო სოფელში ყოველდღიურად გაიმართება სხვადასხვა სახის ღონისძიება, წარმოდგენები, კონცერტები. ყველანაირად სასიამოვნო გარემო იქნება. გვესტუმრება თოვლის ბაბუაც, რომელიც თავის სახლში განთავსდება. პატარებს კი ექნებათ შესაძლებლობა, მოინახულონ ის და თავიანთი სურვილები გაუმხილონ“, – განაცხადა კახა კალაძემ.

დედაქალაქის მერმა საქართველოს პარლამენტის შენობის წინ განთავსებული მთავარი ნაძვის ხეც დაათვალიერა, რომლის კონსტრუქცია, განათებები და აქსესუარებიც ახალია.

თბილისის ქუჩებში სადღესასწაულო განათებები, მთავარ ნაძვის ხესთან ერთად, 15 დეკემბერს, 20:00 საათზე აინთება. ამ დროისთვის ილუმინაციებისა და კონსტრუქციების მონტაჟი 51 ქუჩასა და გამზირზე დასრულებულია, 10 ქუჩაზე კი საახალწლო აქსესუარები უახლოეს დღეებში დამონტაჟდება. საახალწლო დეკორაციები მოსახლეობას 50-მდე სკვერში დახვდება.

გაზიარება