ყველაფერი სპორტის შესახებ ვარდენ მეკალმიშვილთან ერთად."საქართველოს 2024 წლის საუკეთესო სპორტსმენი."
მიმდინარე წელი არნახულად წარმატებული გამოდგა ქართველი ათლეტებისათვის. ბუნებრივიაო, მეტყვით, წელს ხომ ოლიმპიადის წელიაო და ალბათ მართალიც იქნებოდით, რომ არა ერთი მაგრამ...
დიდი სპორტული აღმავლობის ხანა დადგა საქართველოში. აქამდე გაუგონარ მწვერვალებს იპყრობენ ჩვენი თანამემამულეები. ეს ამბავი დიდ იმედს გვისახავს თითოეულ ქართველს, მათ შორის ემიგრანტებს და გვარწმუნებს იმაში, რომ ჩვენი სამშობლო დიდი და სასიკეთო ცვლილებების მიჯნაზე იმყოფება. ეს რომ ასეა, კიდევ ერთხელ დაგვანახა პარიზის ოლიმპიადამ. კიდევ ერთხელ დაგვარწმუნა, თუ როგორ კავშირშია სპორტული მიღწევები და ზოგადად ქვეყნის წარმატებები ერთმანეთთან... ამერიკის შეერთებულმა შტატებმა და ჩინეთმა დიდი ბრძოლა გამართეს ოლიმპიადაზე და 40-40 ოქროს მედლით დაასრულეს ასპარეზობა. ამერიკელებმა მხოლოდ მედლების საერთო რაოდენობით გაუსწრეს ჩინელებს და ოლიმპიადის არაოფიციალურ გუნდურ ჩათვლაში პირველი ადგილი დაიკავეს. ვიღაცეები იტყვიან, ეს წარმატება ბუნებრივია, ამერიკა და ჩინეთი ხომ მსოფლიოს ერთერთი უდიდესი ქვეყნებიაო როგორც ტერიტორიით, ასევე მოსახლეობის რაოდენობითო. მე მათ ასეთ პასუხს გავცემდი, მაშინ რა ქნას 1,5
მილიარდიანმა ინდოეთმა, რომელსაც 3 მილიონიანმა და ტერიტორიით მსოფლიოში 132 ადგილზე მყოფმა, პატარა საქართველომ გაასწრო?
დიახ, დიახ, ჩვენ გავასწარით არა მარტო ჩვენი რეგიონის სახელმწიფოებს, აზერბაიჯანსა და სომხეთს, არამედ 10 სახელმწიფოს მსოფლიოს 15 უდიდესი ქვეყნიდან, რიმელთა მოსახლეობა 100 მილიონს აღემატება...
ტრადიციულად, ყოველი წლის დასასრულს, ტარდება გამოკითხვები საქართველოს საუკეთესო სპორტსმენის გამოსავლენად. მოდით განვიხილოთ წლევანდელი ლაურეატობის კანდიდატები. მე კი ვეცდები გავაკეთო პროგნოზი და გამოვიცნო მომავალი კონკურსის გამარჯვებული. დავიწყოთ ორი ოლიმპიური ჩემპიონით, ორი ლაშათი. ტალახაძე ზედიზედ მესამედ გახდა ოლიმპიური ჩემპიონი ძალოსნობაში, ხოლო ბექაური ზედიზედ მეორედ - ძიუდოში. მათ შორის, მე ქართველ რკინის კაცს, ლაშა ტალახაძეს გამოვარჩევდი, რომელსაც ფენომენალური რეკორდები ეკუთვნის, 225 კგ ატაცში, 267 კგ აკვრაში და 492 კგ ორჭიდში. ლაშა ერთადერთი სამგზის ოლიმპიური ჩემპიონია დამოუკიდებელი საქართველოს ისტორიაში. ამასთან, თუ მძიმე ტრავმების მქონე, 31 წლის ტალახაძისთვის ეს ოლიმპიადა ბოლო იყო მის ბრწყინვალე კარიერაში, 24 წლის ბექაურს კიდევ რამოდენიმეჯერ ექნება ოლიმპიადაზე თავის გამოჩენის შანსი, ასე რომ, მე მათ შორის, ტალახაძეს ავირჩევდი...
შემდეგ მოდის შერეული ორთაბრძოლების ორი დიდოსტატი, UFC-ის ჩემპიონები, ილია თოფურია და მერაბ დვალიშვილი. ორთავე წელს გახდა ჩემპიონი და თანაც, მეტად დამაჯერებლად. მე მათ შორის ილიას გამოვარჩევდი, როგორც ქართველთა შორის UFC-ის პირველ ჩემპიონს. მაგრამ ეს მხოლოდ იმ შემთხვევაში მოხდება, თუ ის 26 ოქტომბერს ჩანიშნულ პირველ საჩემპიონო ორთაბრძოლას მოიგებს და საპატიო ქამარსაც შეინარჩუნებს...
დაბოლოს ფეხბურთი, რომელმაც 2024 წელს ქართველებს ყველაზე დიდი ბედნიერება მოგვიტანა. სწორედ ამიტომ, მე საქართველოს ფეხბურთელთა ეროვნულ ნაკრებს საუკეთესო გუნდად დავასახელებდი, ხოლო ჩვენი მეორე სამშობლოს შვილს, ვილი სანიოლს, საუკეთესო მწვრთნელად. რაც შეეხება ფეხბურთელებს, ქოჩორაშვილს, მიქაუტაძეს და კვარაცხელიას გამოვყოფდი, ხოლო ამ სამიდან კი გიო ქიჩორაშვილს გამოვარჩევდი, როგორც წლის ყველაზე დიდ აღმოჩენასა და მსოფლიო ჩემპიონატის შესარჩევი ტურნირის საუკეთესო მოთამაშეს...
მოკლედ, სამი კანდიდატი დამრჩა, ლაშა ტალახაძე, ილია თოფურია და გიორგი ქოჩორაშვილი, რომელთა შორის მე ქართველ გოლიათს, მსოფლიოს ყველა დროის ყველაზე ძლიერ ადამიანს, ლაშა ტალახაძეს ავირჩევდი...
