ყველაფერი სპორტის შესახებ ვარდენ მეკალმიშვილთან ერთად.
"ფეხბურთი მეკარის გარეშე."
დიახ, დიახ, 31 აგვისტოს ჩვენ ვიხილეთ მატჩი, სადაც ერთმა გუნდმა მეკარის გარეშე ითამაშა...
ეს იყო იტალიის 2024-25 წლების ჩემპიონატის მესამე ტურის მატჩი, გამორჩეული ქართველი ფეხბურთელის, ხვიჩა კვარაცხელიას გუნდის, ნაპოლისა და პარმას სიმპათიურ გუნდებს შორის. პარმა სამი წელია გავარდნილია იტალიის სერია A-დან და წელს დაბრუნდა ევროპის ერთერთ უძლიერეს ლიგაში. ეს უპირველეს ყოვლისა კი გუნდის მთავარი მწვრთნელის, ფაბიო პეკიას დამსახურებაა. თავის დროზე ფაბიო თამაშობდა ნაპოლიში, იუვეში და იტალიის ნაკრებში. მან ნეაპოლში შესანიშნავად გაწვრთნილი გუნდი ჩამოიყვანა, რომელმაც შარშანდელ სეზონში სერია B-ში გაიმარჯვა. "ჯვაროსნები" (ასეთია პარმელთა თიკუნი, ანუ ზედმეტი სახელი) ახალგაზრდა, პერსპექტიული მოთამაშეებით არიან დაკომპლექტებული. ისინი საოცრად ორგანიზებულ, რაციონალურ და ამავდროულად ტექნიკურ ფეხბურთს თამაშობენ. საკმარისია ითქვას, რომ წინა ტურში პარმელებმა სერია A-ს ერთერთი ყველაზე გამორჩეული გუნდის, მილანის დამარცხება შეძლეს. მე ვფიქრობ, რომ ახალგაზრდა მწვრთნელს, ფაბიო პეკიას წინ საინტერესო კარიერული წინსვლა და დიდი გამარჯვებები ელოდება...
წინა ტურში, ბოლონიასთან დიდი ანგარიშით გამარჯვების შემდეგ, ნეაპოლელთა ახალმა და ტიტულოვანმა მწვრთნელმა, ანტონიო კონტემ, მატჩის შემდგომ პრესკონფერენციაზე აღნიშნა, რომ გუნდმა კრიზისი გადალახა და შემდგომი წარმატებებიც არ დაახანებსო. გუშინდელმა მატჩმა საფრთხის ქვეშ დააყენა კონტეს ეს მოსაზრება, რადგან პეკიას მოწაფეებმა უკვე მე-19-ე წუთზე შეძლეს დაწინაურება და თამაშის მიწურულამდე, 92-ე წუთამდე იგებდნენ. გოლი პარტენოპეის (ეს კი ნეაპოლელთა თიკუნია) ახალწვეულმა, რომელუ ლუკაკუმ გაიტანა. ბელგიელმა მოთამაშემ ვიქტორ ოსიმენი შეცვალა, რომელმაც უარი განაცხადა ნაპოლიში თამაშზე . ლუკაკუ თამაშის მეორე ნახევარში გამოვიდა მოედანზე და უკვე პირველივე თამაშში შეძლო გოლის გატანა. რომელუ ანტონიოს ფავორიტი ფეხბურთელია და მწვრთნელი დიდ იმედებს ამყარებს მასზე. 97-ე წუთზე ფრენკი ანგისამ თავით მეორე გოლი გაიტანა პარმელთა მცველის (მცველის და არა მეკარის! ) კარში და ნაპოლიმ მეტად მძიმე გამარჯვების მოპოვება შეძლო...
ანგარიშის გათანაბრებას წინ თამაშის გამორჩეული ეპიზოდი უძღოდა, რამაც განაპირობა კიდეც, ქვემდებარე ბლოგის, ცოტა არ იყოს და უცნაური სათაური...
თამაშის მეორე ნახევარში, როცა პარმელთა მწვრთნელმა ყველა ხუთივე ფეხბურთელის შეცვლის უფლება გამოიყენა, მსაჯმა უხეში თამაშისათვის მოედნიდან მათი მეკარე გააძევა. პარმელები ათი მოთამაშით დარჩნენ, ხოლო მოედნიდან გაძევებული მეკარის ნაცვლად კარში გუნდის მცველი ჩადგა...
მეკარის გაძევება თუ არც თუ ისე იშვიათი შემთხვევაა ფეხბურთში, კარებში ჩამდგარი მინდვრის მოთამაშე ნამდვილად იშვიათი სანახავია. მიუხედავად იმისა, რომ მე გულშემატკივრობის საკმაოდ დიდი, 65 წელზე მეტი სტაჟი მაქვს, მსგავს შემთხვევას ცოტას თუ გავიხსენებ. მათ შორის ყველაზე საინტერესო და ცნობილი კი ერთი ფაქტია, რომელიც ფეხბურთის მეფის, პელეს სახელს უკავშირდება... მანამდე მინდა ორიოდე სიტყვა გითხრათ მატჩებში მოთამაშეთა შეცვლის თაობაზე. პირველად, ერთი მინდვრის მოთამაშისა და მეკარის შეცვლის საშუალება გუნდებს მხოლოდ 1970 წელს, მექსიკაში გამართულ მსოფლიო ჩემპიონატზე მიეცათ. მახსოვს, 1966 წელს ინგლისში ჩატარებულ მსოფლიო ჩემპიონატზე, თუ როგორ დაიმტვრა თამაშისას საბჭოთა ნაკრების ფეხბურთელი იგორ ჩისლენკო. მან თამაშის გაგრძელება ვერ შეძლო და გუნდმა ათი ფეხბურთელით გააგრძელა თამაში...
ბრაზილიის პირველობის ერთერთ მატჩში, პელეს გუნდს, სანტოსს, მეკარე გაუძევეს და კარებში ფეხბურთის მეფე ჩადგა. პელემ რამოდენიმეჯერ იხსნა თავისი გუნდი აშკარა გოლისგან და თვით პენალტის მოგერიებაც კი შეძლო...
რაც შეეხება ხვიჩას, მან კარგი თამაში ჩაატარა. მიუხედავად იმისა, რომ კვარადონას არც გოლი გაუტანია და არც საგოლე გადაცემით გამოუჩენია თავი, ის საუკეთესო იყო მოედანზე. კვარაცხელიამ მატჩის ყველა,103 წუთი ითამაშა და ძალიან აქტიური იყო. მან ყველაზე მეტი დარტყმა შეასრულა მეტოქის კარში და რაც მთავარია, ის გუშინ გუნდის ღირსეული ლიდერი იყო...

გაზიარება