ყველაფერი სპორტის შესახებ ვარდენ მეკალმიშვილთან ერთად..."ევრო-24-ის ექო." ტრიუმფით დასრულდა ჩვენი გუნდისთვის სადებიუტო, ევროპის მე-17-ე ჩემპიონატი ფეხბურთში. ამის შესახებ თითოეულმა თქვენგანმა კარგად იცის, ამიტომ დღეს, ევრო-24-თან დაკავშირებულ და მედია საშუალებებით ნაკლებად გაშუქებულ, საინტერესო ფაქტებზე მინდა გესაუბროთ...
ჩემპიონატის დღეებში, ბევრი რამ ითქვა და დაიწერა ესპანელ ფეხბურთელებზე. განსაკუთრებით ვიხალისეთ ქართველებმა თითქოსდა ხობელ კუკურელიაზე, მაგრამ არაფერი თქმულა ესპანელთა რიგებში მოთამაშე ბასკ ფეხბურთელებზე, რომლებიც, დიდი ალბათობით ქართველთა ნათესავები არიან...
ბასკები უძველესი, ძალიან გამორჩეული, თვითმყოფადი და საოცრად თავისუფლების მოყვარული ხალხია. ისინი ბასკურ ენაზე საუბრობენ და ამბობენ, რომ არ არიან ესპანელები. ბასკები ესპანეთის ჩრდილოეთ ნაწილში, ბისკაის ყურის სანაპიროზე ცხოვრობენ. ბასკთა ერთი ნაწილი, დაახლოებით 300 ათასი ადამიანი, ესპანეთის მოსაზღვრე, საფრანგეთის ტერიტორიაზე ცხოვრობს. ბასკეთის ავტონომიის მოსახლეობა 2 მილიონია, ხოლო მათი ყველაზე დიდი დიასპორა, 10- მლ-მდე ადამიანი, სამხრეთ ამერიკაში ცხოვრობს. მსოფლიოს მრავალი ცნობილი მეცნიერი იკვლევდა და იკვლევს ბასკთა წარმომავლობას, მაგრამ ისინი დღემდე ვერ შეთანხმებულან და ვერ შეჯერებულან რომელიმე ერთ ვარიანტზე. ერთერთი ჰიპოთეზით, ბასკები, უძველეს დროში, კოლხეთის
დაბლობიდან დიდი კატაკლიზმის გამო გადმოხვეწილი ხალხის შთამომავლები არიან. ეს ვარიანტი უამრავი ფაქტით დასტურდება და ორ ხალხს შორის მსგავსებაც საოცარია. ასე რომ, მე პირადად მჯერა, რომ ბასკების ძარღვებში უძველესი კოლხური სისხლი ჩქეფს...
ჰოდაა, ფეხბურთს თამაშობენ ბასკები მაგრად. მოკლედ, დღევანდელ ესპანეთის ნაკრებში თითქმის ნახევარი მოთამაშე ბასკია, მათ შორის, მათი მთავარი მწვრთნელი, დე ლა ფუენტეც. თვით საფრანგეთის ნაკრების დამრიგებელი, დიდიე დეშამიც საფრანგეთის ბასკეთიდანაა. ევრო-24-ის ფინალში, ორივე გოლი ბასკეთის გუნდების წევრებმა გაიტანეს, ნიკო უილიამსმა და მიკელ ოიარსაბალმა.
ბასკეთის საფეხბურთო კლუბებია, ატლეტიკ ბილბაო, სან-სებასტიანის რეალ სისიედადი, ეიბარი, ალავესი, ოსასუნა...
ბილბაოს ატლეტიკი (ეს ქალაქი ავტონომიის ადმინისტრაციული ცენტრია) ერთადერთი გუნდია მსოფლიოში, სადაც მხოლოდ ადგილობრივი ფეხბურთელები თამაშობენ. რაც შეეხება შავკანიან ნიკო უილიამსს, ის ბასკეთშია დაბადებული და აღზრდილი და მას ატლეტიკში თამაშის სრული უფლება აქვს. ანალოგიურად ხდებოდა თავის დროზე თბილისის დინამოშიც, სადაც მხოლოდ ქართველი ან საქართველოში დაბადებული და აღზრდილი ფეხბურთელები თამაშობდნენ. გავიხსენოთ, დოროხოვი, მინაევი, ძიაპშიპა, კალოევი, ცხოვრებოვი, გუცაევი, ბაზაზაშვილი, ცვეიბა და სხვები, რომელთაც სხვადასხვა დროს უთამაშიათ ქართულ კლუბში...
ბასკები არიან მთელ მსოფლიოში სახელგანთქმული ფეხბურთელები, ლანგარა, კარანკა, მენდიეტა, მარკო ასენსიო, ივან სამორანო, რიკელმე, აიალა, საბალეტა, ბურუჩაგა, ოტამენდი, ხავი მარტინესი, გოიკოეჩეა, რაულ გარსია, ეჩებერია, არტეტა, ინიაკი და ნიკო უილიამსები, ლიზარაზუ, ადურისი, ხაბი ალონსო, ფორლანი, საბალეტა, იგუაინი, ირიბარი, სუბისარეტა, კასილიასი, უნაი სიმონი, ოიარსაბალი, მერინო...
"პირენეელ კოლხებს" 1930 წლიდან ჰყავთ თავიანთი ნაკრები და სისტემატურად ატარებენ ამხანაგურ თამაშებს. გუნდი საკმაოდ ძლიერია და ბევრი ბრწყინვალე გამარჯვება აქვს მოპოვებული. მათ შორის, აღსანიშნავია ორი გამარჯვება, რომელიც ბასკების ნაკრებმა 1937 წელს თბილისში, ჩვენს დინამოსთან შეხვედრაში მოიპოვა...
ბასკები ცდილობენ, რათა ესპანეთისგან დამოუკიდებლად გაწევრიანდნენ ფიფასა და უეფაში და მიიღონ მონაწილეობა ევროპისა თუ მსოფლიო პირველობებზე, მაგრამ ჯერჯერობით უშედეგოდ...
მოდით, მივულოცოთ ბრწყინვალე გამარჯვება ესპანეთის ნაკრებში მოთამაშე ბასკ ფეხბურთელებს და ვუსურვოთ მომავალი წარმატებები ...
