ყველაფერი სპორტის შესახებ ვარდენ მეკალმიშვილთან ერთად.
"დიდი საფეხბურთო ფინალი და მის გარშემო გავლებული საინტერესო პარალელები..."

მაშ ასე, 2024 წლის 14 ივლისი, კვირადღე, გერმანია, კიოლნი, "რაინენერჯიშტადი- ონი", ტევადობა 43 ათასი. ევროპის მე17-ე ჩემპიონატის ფინალური შეხვედრა ფეხბურთში (რიგით ბოლო, 51-ე მატჩი)...
ალბათ უკვე გაგიჩნდათ კითხვა, თუ რატომ ვამახვილებ ყურადღებას ზემოთმოყვანილ დეტალებზე, კერძოდ კი სტადიონის სახელსა და დიდი საფეხბურთო ტურნირისათვის ამ არენის საკმაოდ მცირერიცხოვან ტევადობაზე, არაა?
დიახ, დიახ, ეს სწორედ ის ძველი სტადიონია, სადაც 1936 წელს გერმანიაში გამართული ოლიმპიური თამაშები გაიხსნა. ფაქტიურად ეს იყო ჰიტლერის ფაშისტური რეჟიმის ზეიმი და კაცობრიობის ისტორიაში ერთერთი ყველაზე დიდი ბოროტების, მეორე მსოფლიო ომის პრელუდია. როგორც ვიცით, სპორტი და პოლიტიკა ორი განუყოფელი თემაა და ჩემს მიერ მოთხრობილ ისტორიულ პარალელსაც ალბათ გარკვეული სიმბოლური დატვირთვა აქვს...
გერმანელთა მრავალმა თაობამ მოინანია ჰიტლერის შეცოდებანი მსოფლიოს წინაშე, რომელიც მხოლოდ და მხოლოდ გორელი მეწაღის ვაჟის, სოსელოს სუპერგენიამ იხსნა უდიდესი განსაცდელისგან...
რასაკვირველია ისიც იცით, რომ ევროპის საფეხბურთო კავშირმა მიმდინარე ჩემპიონატიდან მოკვეთა რუსეთის ეროვნული გუნდი და ამით ხაზი გაუსვა ამ ქვეყნის მიერ უკრაინაში გაჩაღებული ომის მიუღებლობას და მესამე მსოფლიო ომის გაჩაღების საშიშროებას, სწორედ იმ სახელმწიფოს მიერ, რომელიც არც თუ დიდი ხნის წინ, თვითონვე იყო მუხანათური ფაშისტური თავდასხმის მსხვერპლი...
შენდეგი პარალელი, გაგიკვირდებათ და ჩოგბურთს, კერძოდ კი, ინგლისში მიმდინარე დიდი სასალათის ოთხი ტურნირიდან (ჩოგბურთში მსოფლიო ჩემპიონატი არ იმართება) ერთერთს, უიმბლდონის ღია პირველობას უკავშირდება. თუმცა, სპორტის ამ ორ სახეობას ბევრი საერთო რამ გააჩნია და უპირველესი კი ისაა, რომ ფეხბურთიც და ტენისიც ინგლისელებმა გამოიგონეს. სწორედ კვირას გაიმართება უიმბლდონის ფინალიც, სადაც ერთმანეთს დიდი სასალათის 24 გზის გამარჯვებული, 37 წლის სერბი ჩოგბურთელი, ნოვაკ ჯოკოვიჩი და 21 წლის ახალგაზრდა ესპანელი ტალანტი, კარლოს ალკარასი შეერკინებიან. ჰოდა, ნახევარფინალური მატჩში გამარჯვების შემდეგ კარლიტომ (სხვათაშორის, ამ თამაშში მან რუსი დანიილ მედვედევი დაამარცხა) განაცხადა, რომ თუ აქ მე მოვიგებ ფინალს და გერმანიაში კიდევ ჩვენი ფეხბურთელები, ეს უდიდესი დღესასწაული იქნება ესპანელი გულშემატკივრების- თვისო, რამაც ინგლისელი მაყურებლების სამართლიანი აღშფოთება გამოიწვია...
დიახ, მოგების იმედი და შანსი, რასაკვირველია ორივე ნაკრებს გააჩნია და არცერთი მათგანის მოგება არ იქნება მოულოდნელობა. თუმცა ჩემი სიმპათიები მაინც ესპანელების მხარეს იხრება. ჯერ ერთი იმიტომ, რომ ჩვენ მერვედფინალში სწორედ მათთან დავმარცხდით და მეორე და რაც უმთავრესია, იმიტომ რომ, პირენეის ნახევარკუნძულის მკვიდრნი საუკეთესო, ფანტაზიით მდიდარ ფეხბურთს თამაშობენ. ჩემთვის იმასაც აქვს მნიშვნელობა, რომ ამ გუნდში ბევრი ჩვენი სისხლის მოზიარე, შესანიშნავი ბასკი ფეხბურთელი ასპარეზობს. მათ შორისაა ნაკრების რვა მოთამაშე და გაგიკვირდებათ და თვით ნაკრების მთავარი მწვრთნელი, ლუის დე ლა ფუენტე...
დაბოლოს, კიდევ ერთი, ძალზედ მნიშვნელოვანი საკითხი. უეფამ (ევროპის საფეხბურთო კავშირი) გადაწყვიტა, რომ იმ შემთხვევაში, თუ ევროპის პირველობაზე რამოდენიმე ფეხბურთელი გაიტანს ყველაზე მეტ გოლს, ყველა მათგანს მიენიჭება ევროპის ჩემპიონატის ბომბარდირის წოდება და ასევე, ყველა მათგანი დაჯილდოვდება ოქროს ბუცით. დღეისათვის, ჩვენი გიო მიქაუტაძის დარად კიდევ ხუთ ფეხბურთელს აქვს გატანილი 3 გოლი. მათგან სამმა უკვე დაამთავრა ასპარეზობა, ესპანელ დანი ოლმოსა და ინგლისელ ჰარი კეინს კი აქვთ შანსი, ფინალში გაიტანონ გოლი და გადაასწრონ..

გაზიარება