ყველაფერი სპორტის შესახებ ვარდენ მეკალმიშვილთან ერთად.ზუსტად 5 თვის შემდეგ, 2024 წლის 26 ივლისს, საზეიმოდ გაიხსნება პარიზის 33-ე ოლიმპიური თამაშები. პირველად ისტორიაში, თამაშების გახსნის ცერემონიალი არ ჩატარდება სტადიონზე და მდინარე სენის სანაპიროზე შედგება. ეს იქნება ოლიმპიადების ისტორიაში ყველაზე დიდი, გრანდიოზული სპორტული ზეიმი, რომელსაც ასიათასობით ადამიანი დაესწრება.
დღეიდან ჩვენი ბლოგები სწორედ ოთხწლეულის უპირველეს ღონისძიებას მიეძღვნება. მოგითხრობთ ოლიმპიადების ისტორიაზე, გაგაცნობთ ქართველ ოლიმპიელებს, ვისაუბრებთ ჩვენი სპორტსმენების შესაძლებლობებზე და გავაკეთებთ პროგნოზებს.
პირველ რიგში გეტყვით, რომ ოლიმპიადის თითოეულმა მონაწილემ უნდა მოიპოვოს სათანადო ლიცენზია.
დღეს გაგაცნობთ პირველ ქართველ ლიცენზიანტ ოლიმპიელს, ტყვიით მსროლელს, ნინო სალუქვაძეს. ნინომ ჯერ კიდევ შარშან შეასრულა სალიცენზიო ნორმატივი, როცა მსოფლიო თასის ტურნირი მოიგო. ის 7-გზის მსოფლიო ჩემპიონი და მსოფლიო სუპერ თასის გათამაშების 9-გზის გამარჯვებულია. ასევე არის მსოფლიოს 12-გზის რეკორდსმენი. ნინოს სამივე სინჯის ოლიმპიური მედალი აქვს მოპოვებული, ოქრო, ვერცხლი და ბრინჯაო. მისი მთავარი მიღწევა კი უნიკალურია.
55 წლის ნინომ ცხრა ოლიმპიადაზე მიიღო მონაწილეობა. პარიზი-24 მისთვის სარეკორდო, მე-10-ე იქნება. ნინო გახდება ისტორიაში პირველი სპორტსმენი ქალი, რომელმაც ათ ოლიმპიადაზე იასპარეზა და დაეწევა კაცებს შორის რემორდსმენს, კანადელ ცხენოსან, იან მილერს, რომელმაც ასევე ათ ოლიმპიადაზე მიიღო მონაწილეობა. პარიზი-2024-ზე მილერი ვერ იასპარეზებს, ასე რომ ნინოს ამ საოცარ რეკორდს ჯერჯერობით ვერავინ მოხსნის.
წარმატებებს ვუსურვებ უნიკალური რეკორდების მფლობელ ქართველ ქალბატონს, ნინო სალუქვაძეს და ასევე ვუსურვებ კიდევ ერთი ოლიმპიური მედლის მოპოვებას.
