პრემიერ-მინისტრს თავისი უფლებამოსილება აქვს სომხეთის რესპუბლიკაში. არავითარ შემთხვევაში ეს უფლებამოსილება არ შეიცავს საკითხის გადაწყვეტას პირის დაპატიმრების შესახებ. ეს ყველაფერი კანონიერი პროცედურებით ხდება, – ასე უპასუხა ნიკოლ ფაშინიანმა ჟურნალისტის კითხვას, ვლადიმერ პუტინი რომ სომხეთში ჩავიდეს, დააკავებს თუ არა სომხეთის პოლიცია.ფაშინიანის თქმით, სომხეთის რესპუბლიკა გამოირჩევა დამოუკიდებელი სასამართლო სისტემის არსებობით.
„პირველ რიგში, გეტყვით, რომ სომხეთის რესპუბლიკამ რომის სტატუტზე შეერთების პროცესი 2022 წლის დეკემბერში დაიწყო და ეს გადაწყვეტილება ჩვენს უსაფრთხოების გარემოში ცვლილებების შეფასებით იყო განპირობებული. ჩვენ რომის სტატუტის რატიფიცირება მოვახდინეთ სხვა საკითხებთან ერთად, გავაანალიზეთ 2022 წლის სექტემბრის ომის შედეგები და აღვნიშნეთ, რომ ჩვენს უსაფრთხოების სისტემაში არის გარკვეული ბზარები. ეს გადაწყვეტილება მივიღეთ, რადგან რთული პერიოდი იყო. ეს გადაწყვეტილება სომხეთის უსაფრთხოების დონის ამაღლებას ემსახურება. რაც შეეხება სამართლებრივ ნიუანსებს, ახლა ვერ ვაკეთებ იურიდიულ ანალიზს, რადგან ეს იურისტების საქმეა. ვფიქრობ, როგორც უკვე ვთქვი, სომხეთმა, როგორც პასუხისმგებლიანმა სახელმწიფომ, უნდა შეასრულოს ყველა საერთაშორისო ვალდებულება, მათ შორის რუსეთის ფედერაციასთან, საერთაშორისო თანამეგობრობასთან ურთიერთობაში. სხვათა შორის, ამ თემაზე სხვადასხვა მოსაზრება და სამართლებრივი ანალიზი არსებობს. კერძოდ, არიან იურისტები, რომლებიც ამბობენ, რომ სახელმწიფოს ამჟამინდელ მეთაურებს აქვთ იმუნიტეტი მათი სტატუსიდან გამომდინარე. ვგულისხმობ, რომ ეს არის სამართლებრივი და არა პოლიტიკური საკითხი, რომელზეც უნდა ვიმსჯელო და ვუპასუხო. ნება მომეცით, გაგიმხილოთ საიდუმლო. 2018 წლიდან სომხეთში ბევრი ფართომასშტაბიანი დემოკრატიული რეფორმა დაიწყო და მე არ ვიღებ გადაწყვეტილებას, ვინ უნდა დააკავონ და ვინ – არა. სომხეთში არის სამართლებრივი წესრიგი, არის იურიდიული ინსტიტუტები და ყველა შემთხვევაში სომხეთის იურიდიული ინსტიტუტები არიან ისინი, ვინც იღებენ ასეთ გადაწყვეტილებებს. ამისთვის გვაქვს პროკურატურა, გვაქვს სასამართლოები, გვაქვს საგამოძიებო კომიტეტი და ა.შ. ძალზე მნიშვნელოვანია, რომ როგორც აღმოსავლეთ პარტნიორობის წევრი, სომხეთის რესპუბლიკა გამოირჩევა დამოუკიდებელი სასამართლო სისტემის არსებობით, სომხეთის რესპუბლიკაში არსებობს კანონის უზენაესობა. პრემიერ-მინისტრს თავისი უფლებამოსილება აქვს სომხეთის რესპუბლიკაში. არავითარ შემთხვევაში ეს უფლებამოსილება არ შეიცავს საკითხის გადაწყვეტას პირის დაპატიმრების შესახებ. ეს ყველაფერი კანონიერი პროცედურებით ხდება“, – განაცხადა ფაშინიანმა.
სისხლის სამართლის საერთაშორისო სასამართლომ ვლადიმერ პუტინის დაკავების ორდერი 2023 წლის 17 მარტს გასცა.
